لاہور(سپورٹس ڈیسک) وزیر کھیل پنجاب فیصل ایوب کھوکھر نے امریکا کے صدر ڈونلڈ ٹرمپ کو اپنے ماموں کا بیٹا یعنی کزن قرار دیدیا ہے جس کے بعد ہر طرف چہ مگوئیاں شروع ہو گئی ہیں۔
تفصیلات کے مطابق صوبائی وزیر کھیل پنجاب فیصل ایوب کھوکھر کا کہنا تھا کہ پنجاب میں کھیلوں کے فروغ کے لیے ترجیحات کا تعین کر چکے ہیں، ماضی کی حکومت کے پروجیکٹس کو روکا جاتا تھا، نواز شریف اور شہباز شریف کے پروجیکٹس کو روکا گیا، مسلم لیگ(ن)کی حکومت نے کسی سے بدلے نہیں لیے، لیاقت باغ اسپورٹس کمپلیکس منصوبہ اپوزیشن نے شروع کیا لیکن مکمل ہم کررہے ہیں۔
صوبائی وزیر نے امریکی صدر کا ذکر کرتے ہوئے کہا کہ ڈونلڈ ٹرمپ ہماری ایسے عزت کرتے ہیں جیسے ماموں کا بیٹا ہے۔ انہوں نے کہا کہ عوام کا پیسہ عوام پر ہی خرچ ہونا چاہیے، لیاقت باغ اسپورٹس کمپلیکس منصوبہ 4 سال سے رکا تھا، ہم نے ڈیڑھ سال میں مکمل کیا،پنجاب میں98 سے زائد اسپورٹس کمپلیکسز کا افتتاح کر چکے ہیں،کے پی کا وزیر اعلیٰ اپنی کارکردگی پر کوئی بات نہیں کرے گا۔ ایوب کھوکھر کا کہنا تھا کہ کل بزدلانہ واقعہ ہوا،پاکستان وہ پھلوں والا درخت ہے جس کو پھل لگ چکے ہیں، بیرون ممالک اب سب پاکستانیوں کو عزت کی نگاہ سے دیکھتے ہیں، ٹورنٹو سے زیادہ لاہور، راولپنڈی کی گلیاں محفوظ ہوگئی ہیں۔
