اسلام آباد(کھوج نیوز) سپریم کورٹ نے خواتین کے حق وراثت سے متعلق کیس کا فیصلہ جاری کردیا، فیصلے میں کیا تحریر کیا گیا؟ اس حوالے سے تمام تر تفصیلات سامنے آگئی ہیں۔
تفصیلات کے مطابق جسٹس اطہرمن اللہ اور جسٹس عرفان سعادت پر مشتمل بینچ کا تحریری فیصلہ جاری کیا گیا ہے۔7 صفحات پر مشتمل فیصلہ جسٹس اطہر من اللہ نے استعفے سے قبل تحریر کیا تھا۔ عدالت نے ورثا کو تاخیر سے حق وراثت دینے پر درخواست گزار عابد حسین پر 5 لاکھ روپے جرمانہ عائد کیا ہے۔ سپریم کورٹ نے عابد حسین کی اپیل خارج کرنے کے سندھ ہائی کورٹ کے فیصلے کو برقرار رکھا ہے۔
تحریری فیصلے میں کہا گیا کہ جرمانے کی رقم 7 دن کے اندر رجسٹرار سپریم کورٹ کے پاس جمع کرائی جائے، جرمانے کی رقم ورثا میں تقسیم ہوگی، عابد حسین کا جائیداد تحفہ ہونیکا دعوی ثابت نہ ہوسکا۔ تحریری فیصلے میں کہا گیا کہ وراثت کا حق خدائی حکم ہے، عورتوں کو حق وراثت سے محروم کرنا آئین اور اسلام کی واضح تعلیمات کے منافی ہے، جائیداد کی ملکیت مالک کی وفات کے فورا بعد ہی ورثا کو منتقل ہوجاتی ہے۔ عدالت کا کہنا ہے کہ ریاست کی ذمہ داری ہے خواتین کو کسی تاخیر، خوف یا طویل عدالتی کارروائی کے بغیر وراثت کا حق دلائے اور وراثت سے محروم کرنے والوں کو قانون کے تحت جوابدہ ٹھہرایا جائے۔
