مظفرآباد(کھوج نیوز) نو منتخب وزیراعظم آزاد کشمیر راجہ فیصل ممتاز راٹھور نے سپیشل سیکرٹری اور سینئر سیکرٹری کا عہدہ ختم کرنے کا اعلان کرتے ہوئے کہاکہ سیکرٹری صاحبان کے پاس صرف ایک گاڑی ہوگی۔
تفصیلات کے مطابق نو منتخب وزیراعظم آزاد کشمیر راجہ فیصل ممتاز راٹھور نے اپنے پہلے خطاب میں کہا کہ اللہ نے سیاسی ورکر کے کاندھوں پر بھاری ذمہ داری ڈال دی، یہ ذمہ داری صرف مجھ پر نہیں ان سب پر ہے جنہوں نے مجھے ووٹ دیا، ذوالفقار بھٹو، بے نظیر بھٹو نے میرے والد پر وزرات عظمی کی ذمہ داری ڈالی۔ آج بلاول بھٹو نے مجھ پر اعتماد کیا اور ذمہ داری ڈالی۔
وزیراعظم آزاد کشمیر راجہ فیصل ممتاز راٹھور نے کہا کہ پہلی بار جانے والا وزیر اعظم آنے والے وزیراعظم کو خوش آمدید کہتا ہوا رخصت ہوا، ایکشن کمیٹی حقیقت ہے،جسے تسلیم کرنا ہوگا۔ ان کا کہنا تھا کہ عوام کے مسائل کو وسائل کے اندر رہ کر حل کرنا ہے،کچھ مسئلے حل ہوسکتے تھے،جس میں تاخیر ہوئی، بطور وزیراعظم عہد کرتا ہوں،میرے قلم سے تاخیر نہیں ہوگی۔ نو منتخب وزیراعظم آزاد کشمیر راجہ فیصل ممتاز راٹھور نے کہا کہ لوگ سمجھتے ہیں ہم مراعات یافتہ طبقہ ہیں لیکن ہم سیاست دان ایسینہیں، والد نے ایک مکان بنایا، جسے میں نے الیکشن اخراجات کیلئے فروخت کیا۔میرے اثاثے جو آج ہیں وہ وزرات عظمی کے بعد بھی دیکھ لیجئے گا۔
