پشاور (کھوج نیوز) پاک فوج اور قانون نافذ کرنے والوں اداروں نے مشترکہ کارروائی کرتے ہوئے افغانستان میں استعمال ہونے والا امریکی اور نیٹو افواج کا اسلحہ برآمد کرلیا ہے۔
تفصیلات کے مطابق سکیورٹی ذرائع نے بتایا ہے کہ فورسزکی جانب سے یہ کارروائیاں خیبرپختونخوا کے مختلف اضلاع میں کی گئیں، اس دوران دہشگردوں سے افغانستان میں امریکی اور نیٹو افواج کا استعمال شدہ اسلحہ برآمد کیا ۔ سکیورٹی ذرائع کا کہنا ہے کہ قانون نافذ کرنے والے اداروں نے یہ اسلحہ دہشتگردوں سے پچھلے کچھ مختلف آپریشنز میں برآمد کیا جن میں ایم 4، ایم 16 اور دیگرخود کار جدید اسلحے سمیت نائٹ وژن گاگلز اور دیگر جدید آلات برآمد کیے گئے جب کہ اسلحے میں امریکی فوج اور نیٹو کے زیر استعمال اعلی کوالٹی کا دھماکا خیز مواد اور تاریں بھی شامل ہیں۔
سکیورٹی ذرائع کے مطابق فتنہ الخوارج ان امریکی ہتھیاروں کے ذریعے فاصلے سے پاک افواج کو رات میں بھی نشانہ بنا سکتے ہیں، ان امریکی ہتھیاروں میں اسٹیل ہیڈگولیاں بھی شامل ہیں جو کہ بلٹ پروف جیکٹ میں سے بھی گزرسکتی ہیں۔ سکیورٹی ذرائع کا بتانا ہے کہ امریکی اور نیٹو افواج کے انخلا کے وقت یہ اسلحہ چھوڑ دیا گیا تھا اور دہشتگرد یہ اسلحہ پاکستان میں قانون نافذ کرنیوالوں اداروں کیخلاف استعمال کر رہے ہیں جب کہ امریکی ہتھیاروں پر صاف لکھا ہے کہ وہ امریکی حکومت کی ملکیت ہیں۔
