اسلام آباد(کھوج نیوز) پاکستان کو موجودہ مالی سال میں کتنے بیرونی قرضے اور گرانٹ ملی؟ اس حوالے سے اقتصادی امور ڈویژن نے دستاویزات میں اعدادو شمار جاری کر دیئے ہیں۔
تفصیلات کے مطابق اقتصادی امور ڈویژن کی جانب سے جاری کیے گئے اعدادو شمار میں بتایا گیا ہے کہ پاکستان نے جولائی تا نومبر 3ارب ڈالر سے زائد بیرونی قرضہ حاصل کیا، پاکستان کوگزشتہ سال کے مقابلے 36کروڑ 40 لاکھ ڈالر زیادہ فنڈز ملے جب کہ عالمی مالیاتی اداروں نے 1.25ارب ڈالر اور مختلف ممالک نے 80کروڑ 76 لاکھ ڈالر دیے۔
رپورٹ میں بتایا گیا ہے کہ گزشتہ سال اسی مدت میں ملنے والے 741 ارب روپے کے مقابلے 117 ارب روپے زیادہ ملے، نان پروجیکٹ ایڈ کی مد میں 531 ارب روپے سے زائد قرضہ ملا، اس میں بجٹ سپورٹ کے لیے 273 ارب روپے سے زیادہ قرض لیا گیا۔ دستاویز کے مطابق اسلامی ترقیاتی بینک نے 109 ارب روپے کا شارٹ ٹرم لون دیا، 5 ماہ میں 141 ارب 76 کروڑ روپے کی سعودی آئل فیسیلٹی حاصل ہوئی، سعودی آئل کی یہ سہولت 50 کروڑ ڈالر کے مساوی ہے، مختلف ترقیاتی منصوبوں کے لیے 327 ارب روپے سے زائد قرضہ لیا گیا۔
دستاویز کے مطابق پاکستان کو جولائی سے نومبر کے دوران 15 ارب 32 کروڑ رپے کی گرانٹ ملی، موجودہ مالی سال مجموعی طور پر تقریبا 20ارب ڈالرکی بیرونی مالی معاونت کا تخمینہ ہے۔ دستاویز کے مطابق نیا پاکستان سرٹیفکیٹ میں 96 کروڑ 59 لاکھ ڈالر کی سرمایہ کاری آئی، گزشتہ سال ابتدائی 5 ماہ میں 2 ارب 66 کروڑ ڈالر کا بیرونی قرضہ حاصل ہوا تھا، عالمی بینک، اے ڈی بی، اسلامی ترقیاتی بینک، سعودی عرب نے سب سے زیادہ قرض دیا، 5 ماہ میں حاصل قرض کی پاکستانی کرنسی میں مالیت 858 ارب 27 کروڑ روپے ہے۔
