بلوچستان (کھوج نیوز) بلوچستان میں امن و امان کی صورتحال کو برقرار رکھنے اور سکیورٹی خدشات کے پیش نظر 31 جنوری تک دفعہ 144 نافذ کردی گئی ہے اور اس کا نوٹیفکیشن بھی جاری کر دیا گیا ہے۔
تفصیلات کے مطابق محکمہ داخلہ کی جانب سے جاری ہونے والے نوٹیفکیشن میں بتایا گیا ہے کہ صوبے بھر میں اسلحہ کی نمائش، موٹر سائیکل کی ڈبل سواری، گاڑیوں پر سیاہ شیشوں کا استعمال، بغیر رجسٹریشن موٹر سائیکلوں کی نقل و حرکت، 4 سے زائد افراد کے مجمع ، جلوس یا ریلیاں اور عوامی مقامات پر چہروں کو چھپانے کے لیے مفلر یا ماسک کے استعمال پر پابندی ہوگی۔ حکم نامے کی خلاف ورزی کرنے والوں کے خلاف قانونی دفعات کے تحت سخت کارروائی کی جائے گی۔ تمام اضلاع کے ڈپٹی کمشنرز کو روزانہ کی بنیاد پر دفعہ 144 کے نفاذ کی رپورٹ محکمہ داخلہ کو ارسال کرنے کی ہدایت کی گئی ہے۔
