چین کی ترقی پاکستان کی ترقی، سی پیک کا دوسرا مرحلہ بہت جلد شروع کرینگے: چینی نائب وزیر
اسلام آباد(کھوج نیوز) چینی نائب وزیر سن ہائی یان کا کہنا ہے کہ چین کی ترقی پاکستان کی ترقی ہے، سی پیک کا پہلا مرحلہ بہت کامیاب رہا اب دوسرا مرحلہ شروع کر رہے ہیں۔
تفصیلات کے مطابق چینی نائب وزیر سن ہائی یان کا کہنا تھا کہ سی پیک کا دوسرا مرحلہ شروع کررہے ہیں، ہمیں مزید شراکت داروں کو آن بورڈ لینا ہوگا، دوسرا مرحلہ پیچیدہ ہے، دوسرے مرحلے کو کامیاب بنانے کے لیے کام کررہے ہیں، لوگوں کے لیے ملازمتوں کے نئے مواقع پیدا کر رہے ہیں۔
سن ہائی یان کا کہنا تھا کہ ہم نے دو طرفہ تعلقات میں بہت کچھ حاصل کیا، اس سال چین پاک دوستی کے75سال مکمل ہو رہے ہیں، پاکستان میں سیاسی جماعتوں کے لیڈرز سے مشاورت کی ہے، پاکستان چین کے تعلقات کو بلند ترین سطح پر لے جانا چاہتے ہیں۔ ان کا کہنا تھا کہ چین کی گزشتہ5 سال جی ڈی پی 5.5سیزیادہ رہی، ہم نے لوگوں کوغربت سے نکالا، ان کی آمدنی میں30فیصد اضافہ ہوا، ملک کی معیشت کو اگلے5 سال میں نئی بلندی پر لے جانا ہے، ہم اپنی مارکیٹ اوپن کر رہے ہیں، دیگر ممالک کو مارکیٹ تک رسائی دے رہے ہیں۔
چینی نائب وزیر کا کہنا تھا کہ ہم نے پاکستان میں انڈسٹریل پارک، اسکولز بنائے، مزید پروجیکٹ پرکام کر رہے ہیں، پاکستان میں لوگوں کے لیے ملازمتوں کے نئے مواقع پیدا کر رہے ہیں، سب سے زیادہ 30ہزار پاکستانی طلبہ اسکالر شپ پر چین میں ہیں، ہم پاکستان میں 100اسپتال بنا رہے میں،80ہزار میڈیکل ڈیوائسز دے رہے ہیں، پاکستان میں نرسز اور ڈاکٹرز کو تربیت دے رہے ہیں۔
