اسلام آباد(کھوج نیوز) پاکستان تحریک انصاف کے بانی عمران خان کو دوبارہ اقتدار میں کون لانا چاہتا ہے؟ اس حوالے سے وفاقی وزیر دفاع خواجہ آصف نے بڑا دعویٰ کر دیا ہے۔
تفصیلات کے مطابق وفاقی وزیر دفاع خواجہ آصف کا کہنا تھا کہ پاکستان کو گالیاں نکالنے والوں کو پناہ دینے والوں کی خواہشات ہیں کہ یہ اقتدار میں آئیں، یاد رکھیں 9 مئی کو فوجی تنصیبات پر حملہ انھی مقاصد کے حصول کی کوشش تھی۔ان کے مطابق اس وقت پارلیمنٹ کو یہ بتایا گیا تھا کہ ہم بھارت سے جنگ کا رسک نہیں لے سکتے۔
وزیردفاع کا کہنا تھا کہ ہماری افواج نے اللہ کی مدد سے قوم کا سرفخر سے بلند کیا، ہمارے شہیدوں نے وطن کو جاوداں کیا، دشمن آج بھی تاک میں ہے، جاگتے رہنا۔ ان کا مزید کہنا تھا کہ یہ باہربیٹھے نام نہاد پاکستانی، طالبان سے محبت بھرے مذاکرات کے حامی وطن عزیزکی ترقی اور امن کے دشمن ہیں، یہ پاکستان کو معاشی استحکام اور محفوظ مستقبل سے دور رکھنا چاہتے ہیں۔ خواجہ آصف کا کہنا تھا کہ بانی پی ٹی آئی کے دور میں بھارت نے حملہ کیا، راتوں رات ابھی نندن کو ہم نے ہاتھ جوڑ کے واپس کیا، مئی 2025ء میں بھارت نے حملہ کیا تو پاکستان نے فتح کی تاریخ رقم کی، دنیا حیرت زدہ رہ گئی کہ یہ وہی پاکستان ہے جس نے کچھ سال قبل بھارتی پائلٹ واپس کیا تھا۔
