اسلام آباد(کھوج نیوز) بچے کی پیدائش پر چھٹی نہ دینے پر وفاقی محتسب برائے انسداد ہراسیت (فوسپاہ ) نے سٹیٹ بینک آف پاکستان پر 5لاکھ روپے جرمانہ عائد کر دیا ہے۔
تفصیلات کے مطابق وفاقی محتسب برائے انسدادِ ہراسیت فوزیہ وقار نے بینک افسر کو 30 دن پیٹرنٹی رخصت نہ دینے پر اسٹیٹ بینک پر 5 لاکھ روپے کا جرمانہ عائد کیا۔ محتسب کے مطابق جرمانے کی رقم میں سے 4 لاکھ شکایت گزار افسر سید باسط علی کو ادا کیے جائیں اور مکمل تنخواہ کے ساتھ انہیں 30 دن کی پیٹرنٹی رخصت بھی دی جائے۔ اس کے علاوہ اسٹیٹ بینک کو میٹرنٹی اور پیٹرنٹی رخصت ایکٹ 2023ء کے تحت پالیسی بنانے کی ہدایت بھی کی گئی ہے۔
فوسپاہ کا کہنا ہے کہ پیٹرنٹی رخصت سے انکار صنفی بنیاد پر ہراسمنٹ کے مترادف ہے، میٹرنٹی رخصت دینا اور پیٹرنٹی رخصت سے انکار صنفی امتیاز ہے، بچوں کی دیکھ بھال صرف خواتین کی ذمے داری نہیں، رخصت سے انکار والدین کی مشترکہ ذمے داری اور بچے کے مفاد کو نقصان پہنچانے کے مترادف ہے۔
