ووٹوں کی دوبارہ گنتی،سپریم کورٹ نے (ن) لیگی رہنما کی درخواست خارج کردی

اسلام آباد(کھوج نیوز) سپریم کورٹ نے این اے 97 تاندیانوالہ میں ووٹوں کی دوبارہ گنتی سےمتعلق  (ن) لیگ کے رہنما علی گوہر بلوچ کی نظرِ ثانی درخواست خارج کردی۔ سپریم کورٹ کے جسٹس امین الدین خان اورجسٹس نعیم اختر افغان پر مشتمل 2 رکنی بینچ نے سماعت کرتے ہوئے علی گوہر بلوچ کو وقفے سے قبل دو آپشن دیے۔ سپریم کورٹ نے استفسارکیا کہ نظرِ ثانی درخواست خارج کر دیں یا آپ واپس لیں گے؟ 

درخواست گزار کے وکیل شہزاد شوکت نےعدالت سے استدعا کی کہ نظرِ ثانی درخواست پر میرٹ پر فیصلہ کر دیں، ٹریبونل کا وقت گزر چکا ہے۔ اس پرجسٹس امین الدین نےکہا کہ سپریم کورٹ کا فیصلہ واضح ہے کہ دوبارہ گنتی کی درخواست نہیں دی گئی تھی۔

جسٹس نعیم افغان نے کہا کہ آر او نے الیکشن کمیشن کو تحریری جواب میں کہا تھا کہ کوئی درخواست نہیں ملی، سپریم کورٹ نے 21 اگست کو درخواست خارج کی اور 22 کو آپ نے آر او سے رجوع کر لیا، سپریم کورٹ کے فیصلے کے بعد آر او نے درخواست کی تصدیق شدہ نقل فراہم کر دی، ایسا تاثر بھی مل سکتا ہے کہ آر او کو نوازا گیا جس پر وہ اپنی بات سے مکر گیا۔

جسٹس نعیم افغان نے استفسار کیا کہ جس آراو نے لکھ کردیا کہ درخواست نہیں آئی، وہ اب درخواست کی تصدیق شدہ کاپی کیسے دے رہا ہے؟ جو دستاویزات اب دکھا رہے ہیں یہ پہلے ہوتیں تو ضرور جائزہ لیتے، مناسب ہو گا کہ علی گوہر بلوچ ٹربیونل سے رجوع کریں۔