عمران خان فوج کے متعلق کیا کرنا چاہتے ہیں؟ خواجہ آصف نے بڑا دعویٰ کر دیا

اسلام آباد(کھوج نیوز) پاکستان تحریک انصاف کے بانی عمران خان فوج کے متعلق کیا کرنا چاہتے ہیں؟ اس حوالے سے وفاقی وزیر دفاع خواجہ آصف نے بڑا دعویٰ کر دیا ہے۔

تفصیلات کے مطابق خواجہ آصف نے کہا کہ آرمی چیف جنرل عاصم منیر برطانیہ کے اہم دورے پر ہیں، پاکستان کے برطانیہ کے ساتھ اہم سفارتی،عسکری اور معاشی تعلقات ہیں، دونوں ممالک کے درمیان مختلف شعبوں میں تعلقات مثالی ہیں۔ وزیر دفاع نے کہا کہ بانی پی ٹی آئی چاہتے تھے فوج ان کی جماعت کا ذیلی ادارہ بن جائے، اقتدار سے محرومی کے بعد پی ٹی آئی اپنے زخم چاٹ رہی ہے، مذموم مقاصد کیلئے 9 مئی اور 26 نومبر کے واقعات رونماکیے گئے، قومی املاک پرحملے اور شہداء کی یادگاروں کی بے حرمتی کے واقعات ایک حقیقت ہیں۔

وزیر دفاع نے مزید کہا کہ ہم نے سیاسی انتقام کا سامنا کیا لیکن ملکی وقار کیخلاف کوئی بات نہیں کی، انتشار کی سیاست ہمیشہ کیلئے دفن ہوجائے گی، الحمد للہ، ملک استحکام کی راہ پر گامزن ہے، معاشی میدان میں کامیابیاں حاصل ہورہی ہیں، قومی محاذ پر کامیابیوں سے پی ٹی آئی کی پریشانی اور بیزاری بڑھ گئی ہے۔ خواجہ آصف کا کہنا تھا کہ پی ٹی آئی والوں کی سیاست ایک ذات کے لیے ہے، انہیں ملک کی کوئی فکر نہیں، پی ٹی آئی کا طرز عمل ہر گز سیاسی نہیں ہے۔