رواں سال ایلون مسک کی دولت میں کتنی کمی آئی ہے ؟کیا اب بھی ایلون مسک دنیا کے امیر ترین شخص ہیں؟

امریکہ(مانیٹرنگ ڈیسک) امریکی صدر ڈونلڈ ٹرمپ کے مشیر اور دنیا کے امیر ترین شخص ایلون مسک کے لیے 2025 کا سال مالی لحاظ سے کچھ زیادہ اچھا ثابت نہیں ہوا۔ایک طرف وہ ٹرمپ حکومت میں اپنی انوکھی پالیسوں کی وجہ سے تنقید کی زد میں ہیں تو دوسری طرف رواں سال کے دوران ایلون مسک کی دولت میں 132 ارب ڈالرز کی کمی آچکی ہے۔

صرف ایک دن میں 10 مارچ کو ہی ایلون مسک کو 29 ارب ڈالرز کا نقصان برداشت کرنا پڑا ہے اور ان کی مجموعی دولت اب 301 ارب ڈالرز تک گھٹ گئی ہے۔ایلون مسک نے سال کا آغاز 433 ارب ڈالرز کے ساتھ کیا تھا اور بظاہر امریکی حکومت کے لیے ان کی جانب سے تجویز کردہ مالی بچت کے اقدامات ان کی اپنی کمپنیوں کے لیے کچھ زیادہ اچھے ثابت نہیں ہو رہے۔

10 مارچ کو ایلون مسک کی کمپنی ٹیسلا کے حصص کی قیمتوں میں 15 فیصد کمی آئی جس کے نتیجے میں ایلون مسک کو 29 ارب ڈالرز سے محروم ہونا پڑا۔لیکن تین ماہ میں 132 ارب ڈالرز کی کمی کے باوجود ایلون مسک تاحال دنیا کے امیر ترین شخص ہیں۔