ایلون مسک کو بڑا جھٹکا، اربوں ڈالر اڑن چھو

امریکہ (مانیٹرنگ ڈیسک) امریکی صدر ڈونلڈ ٹرمپ کے مشیر اور دنیا کے امیر ترین شخص ایلون مسک کو بڑا جھٹکا لگ گیا ہے ان کے اربوں ڈالر اڑن چھو کیسے ہوئے؟ تفصیل آگئی ہے۔

انٹرنیشنل میڈیا کے مطابق امریکی صدر ڈونلڈ ٹرمپ کے مشیر اور دنیا کے امیر ترین شخص ایلون مسک کے لیے 2025ء کا سال مالی لحاظ سے کچھ زیادہ اچھا ثابت نہیں ہوا۔ 2025ء کے دوران ایلون مسک کی دولت میں 132 ارب ڈالرز کی کمی آچکی ہے۔ درحقیقت 10 مارچ کو ہی ایلون مسک کو 29 ارب ڈالرز کا نقصان برداشت کرنا پڑا ہے اور ان کی مجموعی دولت اب 301 ارب ڈالرز تک گھٹ گئی ہے۔ ایلون مسک نے سال کا آغاز 433 ارب ڈالرز کے ساتھ کیا تھا اور بظاہر امریکی حکومت کے لیے ان کی جانب سے تجویز کردہ مالی بچت کے اقدامات ان کی اپنی کمپنیوں کے لیے کچھ زیادہ اچھے ثابت نہیں ہو رہے۔ دسمبر 2024 میں ان کی دولت 486 ارب ڈالرز کی ریکارڈ سطح تک پہنچی تھی۔ 10 مارچ کو ایلون مسک کی کمپنی ٹیسلا کے حصص کی قیمتوں میں 15 فیصد کمی آئی جس کے نتیجے میں ایلون مسک کو 29 ارب ڈالرز سے محروم ہونا پڑا۔