اسرائیل کی لبنان پر پھر بمباری، مزید حملوں کیلئے ریڈ الرٹ جاری کر دیا

لبنان (مانیٹرنگ ڈیسک) اسرائیل نے ایک بار پھر لبنان پر حملے شروع کر دیئے ہیں جس کے بعد اسرائیل کی جانب سے مزید حملوں کے لئے ریڈ الرٹ بھی جاری کر دیا گیا ہے۔

انٹرنیشنل میڈیا کے مطابق اسرائیلی فوج نے لبنان کے مختلف علاقوں پر تقریبا 15 حملے کیے ہیں جن میں 2 افراد جاں بحق اور 8 زخمی ہونے کی اطلاعات ہیں۔ اسرائیلی فوج کا کہنا ہے کہ لبنان پر حملوں کا سلسلہ ختم نہیں ہوا، آئندہ گھنٹوں میں لبنان پر مزید حملے کیے جائیں گے۔ میڈیا کے مطابق آج صبح لبنان سے اسرائیل پر تین راکٹ فائرکیے گئے، اسرائیلی فوج نے راکٹ حملہ ناکام بنانے کا دعوی بھی کیا۔

حزب اللہ نے اسرائیلی حملوں پر رد عمل میں کہا ہے کہ اسرائیل پر راکٹ حملے میں حزب اللہ کا کوئی ہاتھ نہیں،لبنان میں جنگ بندی معاہدے کی مکمل پابندی کر رہے ہیں۔ حزب اللہ کا کہنا ہے کہ اسرائیل راکٹ حملے کا بہانہ بنا کر لبنان پر دوبارہ جنگ مسلط کرنا چاہتا ہے۔ دوسری جانب غزہ میں بمباری سے 48 گھنٹوں میں مزید 130 فلسطینی شہید ہوگئے جب کہ پانچ روز میں شہدا کی تعداد 630 سے زیادہ ہوگئی، ایک لاکھ 20 ہزار سے زیادہ فلسطینی دوبارہ دربدر ہوگئے۔