واشنگٹن (مانیٹرنگ ڈیسک) پاکستان اور امریکا کے درمیان بڑھتے ہوئے تعلقات پر بھارت کی چالاکیاں، امریکی وزیر خارجہ مارکوروبیو نے دبنگ ردعمل دیتے ہوئے بولتی بند کروا دی۔
انٹرنیشنل میڈیا کے مطابق امریکی وزیر خارجہ مارکو روبیو نے کہا کہ پاکستان اور بھارت کے درمیان موجود کشیدگی کی وجہ سے بھارت کے خدشات فطری ہیں، بھارت کو سمجھنا ہوگا کہ ہمیں بہت سے ممالک کے ساتھ تعلقات رکھنے ہوتے ہیں اور ہم پاکستان کے ساتھ اپنے اسٹریٹیجک تعلقات کو وسعت دینے کا موقع دیکھ رہے ہیں۔
مارکو روبیو نے مزید کہا کہ ہمارا کام یہ ہے کہ جہاں ممکن ہو مشترکہ مفادات پر ممالک کے ساتھ شراکت داری کے مواقع پیدا کریں، مجھے لگتا ہیکہ سفارتکاری سے متعلق بھارتی بہت پختہ اور حقیقت پسندانہ رویہ رکھتے ہیں، ہم جانتے ہیں بھارت سے متعلق کچھ چیلنجز ہیں مگر ہمارا مقصد نئے مواقع پیدا کرنا ہے۔ انہوں نے کہا کہ میرا خیال ہے پاکستان نے پاک بھارت ممکنہ جنگ رکوانے میں ٹرمپ کے کردارکو سراہا ہے، پاک بھارت تنازع کے شروع ہونے سے پہلے ہی میں نے ان سے رابطہ کیا تھا، ہمیں لگتا ہے کہ کئی شعبے ہیں جن میں ہم ایک ساتھ کام کر سکتے ہیں۔ امریکی وزیر خارجہ کا کہنا تھا کہ بھارت کے بھی کچھ ممالک کے ساتھ تعلقات ہیں جن کے ساتھ ہمارے نہیں ہیں، کچھ ممالک کے دوسرے ممالک سے تعلقات ہونا یا نہ ہونا عملی خارجہ پالیسی کا حصہ ہے اور مجھے نہیں لگتا کہ ہم جوکچھ پاکستان کیساتھ کر رہے ہیں وہ بھارت سیتعلقات کی قیمت پرہے۔
