امریکا (مانیٹرنگ ڈیسک) امریکی جریدے دی نیشنل انٹرسٹ نے سندھ طاس معاہدے کے خلاف بھارتی اقدامات پر پاکستانی مؤقف کی بھرپور حمایت کر کے دنیا بھر میں ہلچل مچا دی ہے۔
انٹرنیشنل میڈیا کے مطابق امریکی جریدے کا کہنا ہے کہ سندھ طاس معاہدے کی معطلی علاقائی کشیدگی بڑھائے گی اوربھارت کا دلہستی اسٹیج۔II منصوبہ سندھ طاس معاہدے کے خلاف قدم ہے۔امریکی جریدے نے کہا ہے کہ بھارت پر مغربی دریاؤں کا پانی پاکستان کے لیے مہیا کرنا قانونی طور پر لازم ہے، پانی کو ہتھیار بنانے کی بھارتی کوشش عالمی عدالتوں اور بین الاقوامی قانون کی نظرمیں ناقابل قبول ہے۔
امریکی جریدے کے مطابق عالمی ثالثی عدالت نے واضح کیا ہے کہ بھارت سندھ طاس معاہدہ یکطرفہ طور پر معطل نہیں کرسکتا، سندھ طاس معاہدہ جنوبی ایشیا میں فوڈ سکیورٹی کی بنیادی ضمانت ہے۔ امریکی جریدے نے کہا ہے کہ بھارت پانی کو اسٹریٹجک ہتھیار بنا رہا ہے، پانی کا بحران جنوبی ایشیا میں بڑا انسانی خطرہ بن سکتا ہے، بھارت کی جانب سے آبی ڈیٹا کی فراہمی روکنا بین الاقوامی قوانین کی خلاف ورزی ہے۔
