پشاور (کھوج نیوز) پاکستان میں عارضی قیام کی اجازت کے لئے دو سابق افغان فوجی افسران کی طرف سے دائر کی جانے والی درخواستوں کو پشاور ہائیکورٹ نے خارج کر دیا ہے۔
تفصیلات کے مطابق پشاور ہائیکورٹ کے جسٹس وقار احمد اور جسٹس کامران حیات میانخیل نے دو سابق افغان فوجی افسران کے عارضی قیام سے متعلق درخواستوں پر سماعت کی۔ پشاور ہائیکورٹ کے مطابق درخواست گزار سابق افغان صدارتی پروٹیکٹو سروس میں اسپیشل ایجنٹ رہ چکے جبکہ دوسرے درخواست گزار سابق افغان نیشنل آرمی میں خدمات انجام دے چکے ہیں۔
دونوں درخواست گزاروں کا موقف ہے کہ افغانستان واپسی پر انہیں جان کا خطرہ ہے۔ درخواست گزاروں نے ہنگامی طبی علاج کی بھی استدعا کی تھی۔ پشاور ہائیکورٹ نے فیصلے میں کہا کہ درخواست گزار کا کہنا تھا کہ انہوں نے ویزے کی تجدید کے لئے درخواست دے رکھی ہے۔ عدلاتی حکم نامے میں کہا گیا کہ ویزے کی تجدید اور توسیع سے متعلق معاملات متعلقہ حکام کے دائرے میں آتے ہیں، آرٹیکل 199 کے تحت مداخلت کا کوئی جواز نہیں بنتا، اس لیے دونوں درخواستیں خارج کی جاتی ہیں۔
