پولیس ایکٹ 2017 میں ترامیم، آئی جی جی تعیناتی کا اختیار صوبے کو دینے کا ترمیمی مسودہ تیار
پشاور (کھوج نیوز) خیبرپختونخوا حکومت نے پولیس ایکٹ 2017 میں ترامیم کا فیصلہ کیا ہے، آئی جی پی خیبر پختونخوا کی تعیناتی کا اختیار صوبے کو دینے کے لیے ترمیمی مسودہ تیار کرلیا گیا ہے۔
تفصیلات کے مطابق ذرائع کا کہنا ہے کہ اس ترمیم کے تحت بیوروکریسی کی طرح آر پی او اور ڈی پی او کی تعیناتی اور تبادلے کا اختیار بھی وزیراعلی کو حاصل ہوگا جب کہ مجوزہ ترامیم کے تحت پولیسنگ کی نگرانی کے لیے پبلک سیفٹی کمیشن قائم کیا جائے گا۔ اس حوالے سے وزیر قانون آفتاب عالم نے کہا کہ پولیس ایکٹ 2017 میں بہتری لارہے ہیں، پولیسنگ صوبائی سبجیکٹ ہے، یہ وفاق کا اختیار نہیں، پولیس پر چیک اینڈ بیلنس بہتر کررہے ہیں تاکہ اختیارات کا غلط استعمال نہ ہو۔ صوبائی وزیر قانون کا کہنا تھا کہ پشاور ہائیکورٹ نے غیر آئینی فیصلہ دے کر آر پی اوز اور ڈی پی اوز کے تبادلوں سے متعلق صوبے سے اختیار لیا تھا، پولیس کے اختیارات کم نہیں بلکہ مزید بہتر بنا رہے ہیں۔
