گوگل کی جانب سے ایک سال قبل کیے گئے اعلان پر عملدرآمد شروع
گوگل کی جانب سے اعلان کیا گیا تھا کہ میپس لوکیشن ہسٹری کو آپ کے فون میں منتقل کیا جا رہا ہے اور اب اس کو بڑے پیمانے پر متعارف کرانے کا سلسلہ شروع ہوگیا ہے
امریکہ (مانیٹرنگ ڈیسک) گوگل میپس کی جانب سے ایک سال قبل کیے گئے اعلان پر اب عملدر آمد شروع ہوگیا ہے جس کے بعد صارفین کو گوگل میپس استعمال کرنے میں آسانی ہو گئی۔
تفصیلات کے مطابق 9 ٹو 5 گوگل کی ایک رپورٹ کے مطابق اینڈرائیڈ یا آئی او ایس ڈیوائسز پر گوگل میپس اوپن کرکے اوپری دائیں کونے پر پروفائل فوٹو پر کلک کریں اور وہاں نیچے یور ٹائم لائن آپشن کو سلیکٹ کریں۔ ایسا کرنے پر ایک پروموٹ نظر آئے گا جس میں لکھا ہوگا کہ ‘آپ کی ٹائم لائن اب آپ کی ڈیوائس میں تیار کی گئی ہے’۔ گوگل کے مطابق آپ کے وزٹ اور روٹس خودکار طور پر آپ کی ڈیوائسز میں ایک میپ میں محفوظ ہو جائیں گے۔
اس سے قبل گوگل کی جانب سے صارفین کے ڈیٹا کو کلاڈ سرورز پر محفوط کیا جاتا تھا مگر صارفین کی پرائیویسی کو بہتر بنانے کے لیے اسے ڈیوائسز میں محفوظ کرنے کا فیصلہ کیا گیا۔ یور ٹائم لائن جسے پہلے لوکیشن ہسٹری کہا جاتا تھا، فون تک محدود ہوگی اور آپ کے ذاتی فون سے ہٹ کر دیگر ڈیوائسز میں اسے استعمال نہیں کیا جاسکے گا۔ اس کا ویب وریژن بھی دستیاب نہیں ہوگا، البتہ آپ اس کا بیک اپ تیار کرسکتے ہیں یا ڈیوائس ٹرانسفر سسٹم کو استعمال کرسکتے ہیں۔ اس تبدیلی کے بعد گوگل کی جانب سے آپ کو 6 ماہ کا وقت دیا گیا ہے جس کے بعد کلاڈ سرورز پر محفوظ گوگل میپس کی تمام لوکیشن ہسٹری کو ڈیلیٹ کر دیا جائے گا۔ یعنی اس نئی اپ ڈیٹ کے بعد ماضی کا ڈیٹا گوگل میپس میں محفوظ نہیں ہوگا۔
