ملتان ٹیسٹ کا دوسرا روز، قومی ٹیم کی بیٹنگ لائن لاکھڑا گئی، 76رنز پر 4کھلاڑی آئوٹ
پاکستان ٹیم مشکلات سے دوچار ' 76 رنز پر 4 بیٹرز پویلین لوٹ گئے۔ کپتان شان مسعود اور محمد ہریرہ 2، 2 رن بنا سکے،کامران غلام 19 اور بابر اعظم 31 رنز بنا کر آؤٹ ہوگئے
ملتان (سپورٹس ڈیسک) ملتان ٹیسٹ کے دوسرے روز ویسٹ انڈیز کی جانب سے دیئے گئے 254رنز ہدف کے تعاقب میں قومی ٹیم کی بیٹنگ لائن لاکھڑا گئی ہے کیونکہ 76رنز پر 4کھلاڑی آئوٹ ہوگئے ہیں۔
تفصیلات کے مطابق ملتان ٹیسٹ میں ویسٹ انڈیز نے دوسری اننگز 9 رنز کی برتری کے ساتھ شروع کی، کپتان بریتھ ویٹ اور میکائیل لوئیس نے 50 رنز کی بنیاد رکھی، میکائل 7 رن بنا کر آؤٹ ہوئے پھر عامر جنگو نے کپتان کے ساتھ اسکور 92 تک پہنچایا۔ بریتھ ویٹ کی 52 رنز کی اننگز نعمان علی نے تمام کی، اس کے بعد رنز بھی بنتے رہے اور وکٹیں بھی گرتی رہیں۔ املاچ نے 35 اور سنکلیئر نے 28 رنز بنائے اور ویسٹ انڈیز کی پوری ٹیم ٹیم 244 رنز بنا کرآٹ ہوگئی اور پاکستان کو جیت کیلئے 254 رنز کا ہدف دیا۔ نعمان علی اور ساجد خان نے چار چار وکٹیں حاصل کیں، ابرار اور کاشف نے ایک ایک کھلاڑی کو آؤٹ کیا۔
واضح رہے کہ 254 رنز کے تعاقب میں پاکستان ٹیم مشکلات سے دوچار ہوگئی اور 76 رنز پر 4 بیٹرز پویلین لوٹ گئے۔ کپتان شان مسعود اور محمد ہریرہ 2، 2 رن بنا سکے،کامران غلام 19 اور بابر اعظم 31 رنز بنا کر آؤٹ ہوگئے۔ سعود شکیل 13 اور نائٹ واچ مین کاشف علی ایک رن کے ساتھ ناٹ آؤٹ ہیں۔ پاکستان ٹیم کو جیت کیلئے 178 رنز درکار ہیں اور اس کی 6 وکٹیں باقی ہیں۔ دوسرے ٹیسٹ میچ میں ویسٹ انڈیز کی ٹیم پہلی اننگز میں 163 رنز بنا کر آؤٹ ہو گئی تھی جبکہ پاکستان کی ٹیم 163 رنز کے جواب میں اپنی پہلی اننگز میں 154 رنز بنا سکی تھی۔
