ہیوی ٹریفک کے لیے نئے اوقات جاری ،کس وقت تک شہر میں داخلے پر پابندی ہو گی ؟

کراچی (کھوج نیوز)کراچی میں ہیوی ٹریفک کے صبح 6 سے رات 10 بجے تک شہر میں داخلے پر پابندی عائد کر دی گئی۔کمشنر کراچی کی جانب سے جاری نوٹیفکیشن کے مطابق شہریوں کے تحفظ اور ٹریفک کا بہا یقینی بنانے کیلئے دفعہ 144 نافذ کی گئی ہے، جس کے تحت ہیوی ٹریفک کے صبح 6 بجے سے رات 10 بجے تک آمدورفت پر پابندی ہو گی۔اعلامیے میں کہا گیا ہے کہ رات 10 سے صبح 6 بجے تک ہیوی ٹریفک کو شہر میں داخلے کی اجازت ہو گی۔

کمشنر کراچی کی جانب سے جاری اعلامیے میں کہا گیا ہے کہ پابندی کا اطلاق ادویات، پانی، خوردنی تیل لے جانے والی گاڑیوں پر نہیں ہو گا۔

اس سے قبل کراچی میں دن دیہاڑے ڈمپروں کی جانب سے موٹر سائیکل سواروں اور دیگر گاڑیوں کو ٹکر مارنے کے مختلف حادثات میں رواں سال اب تک 108 افراد جان کی بازی ہار چکے ہیں جبکہ حادثات کے بعد مشتعل افراد کی جانب سے گاڑیوں کو جلائے جانے کے متعدد واقعات بھی رپورٹ ہو چکے ہیں۔