پاکستان کا پہلا جنریٹیو آرٹیفیشل انٹیلیجنس تخلیقی اسٹوڈیو لانچ کردیا گیا

کراچی(ٹیکنالوجی ڈیسک)سمیٹری گروپ لمیٹڈ کی جانب سے باضابطہ طور پر پاکستان کا پہلا جنریٹیو آرٹیفیشل انٹیلیجنس تخلیقی اسٹوڈیو لانچ کر دیاگیا ہے۔کمپنی نے روز پاکستان اسٹاک ایکسچینج کو جاری کردہ ایک اعلامیے میں بتایا کہ AffairStudio.ai کا مقصد برانڈز کے لیے تخلیق اور رابطے کے انداز کو ذہین کہانی گوئی کے ذریعے نئے سرے سے متعارف کروانا ہے۔یہ اسٹوڈیو ملک میں اشتہاری فلموں جیسے مواد کی تیاری کے انداز کو بدلنے کی صلاحیت رکھتا ہے، اور اس کا آغاز سمیٹری گروپ کی مصنوعی ذہانت پر مبنی تخلیقی حل کی جانب حکمت عملی کے تحت توسیع کی عکاسی کرتا ہے، جس کا مقصد ڈیجیٹل تبدیلی اور برانڈ انگیجمنٹ میں جدت کی قیادت کرنا ہے۔

اعلامیے میں مزید کہا گیا ہے کہ سمیٹری گروپ AffairStudio.ai میں 70 فیصد ایکوئٹی شیئر رکھتا ہے اور اس منصوبے کی اسٹریٹجک نگرانی بھی برقرار رکھے گا، جو کہ مصنوعی ذہانت سے چلنے والے ڈیجیٹل تجربات میں کمپنی کی وسیع تر ترقی اور جدت کی حکمت عملی سے ہم آہنگ ہے۔کمپنی کے مطابق، یہ منصوبہ انسانی جذبات اور ذہین ٹیکنالوجی کو یکجا کر کے اگلی نسل کے تخلیقی ماڈلز کی قیادت کے ہمارے عزم کی عکاسی کرتا ہے۔

سمیٹری گروپ لمیٹڈ ایک معروف ڈیجیٹل ٹیکنالوجی اور تجربات پر مبنی کمپنی ہے، جو ڈیجیٹل اسٹریٹجی، ٹرانسفارمیشن، آرٹیفیشل انٹیلیجنس، ڈیجیٹل کامرس، ڈیٹا سائنس، موبیلیٹی، ریٹیل/ریسرچ اور انٹرایکٹو مارکیٹنگ جیسے شعبوں میں کاروباری افعال کی ڈیجیٹلائزیشن میں مہارت رکھتی ہے۔