بھارت میں ہونے والے ایشیا کپ ہاکی میں پاکستان کی شرکت کی راہ ہموار ہوگئی؟
بھارتی وزارت کھیل کے ذرائع نے کہا ہے کہ ہم بین الاقوامی ٹورنامنٹس میں پاک بھارت مقابلوں کے خلاف نہیں
نیودہلی(سپورٹس ڈیسک)بھارت میں ہونے والے ایشیا کپ ہاکی میں پاکستان کی شرکت کی راہ ہموار ہوگئی؟بھارتی میڈیا نے ایونٹ میں پاکستان کی شرکت پر مثبت خبریں دینا شروع کردیں۔بھارتی سرکاری خبر رساں ادارے نے بھی پاکستان کی شرکت کے حوالے سے خبر جاری کردی۔بھارتی وزارتِ کھیل کے ذرائع نے خبر رساں ادارے سے گفتگو میں بتایا کہ پاکستان ہاکی ٹیم کو ایشیا کپ میں شرکت سے نہیں روکیں گے۔خبر رساں ایجنسی کے مطابق بھارتی وزارت کھیل کے ذرائع نے کہا ہے کہ ہم بین الاقوامی ٹورنامنٹس میں پاک بھارت مقابلوں کے خلاف نہیں، بین الاقوامی مقابلوں کا تقاضہ ہے کہ ہم ان میچز سے پیچھے نہیں ہٹ سکتے۔
ایک بھارتی اخبارنے دعوی کیا ہے کہ بھارت کی وزارتِ داخلہ اور وزارتِ خارجہ نے ایونٹ میں پاکستان کی شرکت کے لیے کلیئرنس دے دی ہے۔بھارت میں ہاکی ایشیا کپ 27 اگست سے 7 ستمبر تک کھیلا جائے گا۔پاکستان ہاکی فیڈریشن ایونٹ میں شرکت کو حکومتی اجازت سے مشروط قرار دے چکی ہے۔پاکستان ہاکی فیڈریشن کے سیکریٹری جنرل رانا مجاہد کا ماضی میں بیان سامنے آیا تھا کہ اگر حکومت نے اجازت دی تو ہی بھارت میں ایشیا کپ کھیلیں گے۔دوسری جانب حکومتِ پاکستان کی جانب سے اب تک ایونٹ کے حوالے سے کوئی ردِعمل نہیں آیا ہے۔
