پاکستان کے لیجنڈری فاسٹ بولر اور سوئنگ کے سلطان کے نام سے مشہور وسیم اکرم نے اپنی کامیابیوں کا سہرا عمران خان کے سر سجادیا۔
انگلش کرکٹرز مائیکل وان، سر الیسٹر کُک، ڈیوڈ لائیڈ اور فل ٹفنل کے ہمراہ ایک انٹرویو میں گفتگو کرتے ہوئے وسیم اکرم نے کہا کہ ’عمران خان بلاشبہ سب سے بہترین کپتان تھے جن کی کپتانی میں میں کھیلا لیکن وہ قدرتی طور پر اتنے باصلاحیت نہیں تھے بلکہ اپنی محنت اور عزم سے کامیابی حاصل کی‘۔
وسیم اکرم کا کہنا تھا کہ ’میں نے کرکٹ میں جو کچھ کیا، میدان میں اور میدان سے باہر اس کا کریڈٹ عمران خان کو جاتا ہے، وہ ہمیشہ ہمیں اعتماد دیتے، فرنٹ سے لیڈ کرتے اور اپنی صلاحیتوں پر یقین رکھتے تھے‘۔
انہوں نے کہا کہ’لوگ مجھے قدرتی ٹیلنٹڈ بولر کہتے تھے لیکن عمران خان کی کامیابی سخت محنت کی وجہ سے تھی، کپتان قدرتی ٹیلنٹڈ نہیں تھے، انہوں نے محنت سے سب کچھ حاصل کیا، 1976 میں اپنی بولنگ ایکشن ہی بدل ڈالا جو انتہائی مشکل کام ہے لیکن وہ اتنے پُرعزم تھے کہ کر دکھایا’۔
سابق کپان نے مزید کہا کہ ‘عمران خان ٹیم کے کھلاڑیوں سے 100 فیصد کارکردگی چاہتے تھے اور سست روی برداشت نہیں کرتے تھے، اگر کوئی کھلاڑی میدان میں سست ہوتا تو وہ ڈانٹ دیتے تھے لیکن اگر آپ نے پوری محنت کی ہو اور نتیجہ اچھا نہ نکلے تو وہ اسے تسلیم کرتے تھے’۔
یاد رہے کہ وسیم اکرم نے 1984 میں ڈیبیو کیا تھا، اس دوران عمران خان نے نوجوان فاسٹ بولر کی رہنمائی کی اور انہیں دنیا کے بہترین گیند بازوں میں شامل ہونے کا موقع دیا۔
بعدازاں پاکستان نے عمران خان کی قیادت میں پہلا اور واحد ورلڈکپ جیتا تھا اور وسیم اکرم اس ایونٹ کے فائنل کے مین آف دی میچ بھی قرار پائے تھے۔
