آسٹریلوی کرکٹر کی ٹرپل سنچری، نئی تاریخ رقم کر دی

آسٹریلیا (سپورٹس ڈیسک) آسٹریلیا سے تعلق رکھنے والے نوجوان کرکٹر نے ون ڈے کرکٹ میچ میں ٹرپل سنچری بنا کر نئی تاریخ رقم کر دی ہے ، انہوں نے اپنی اننگز میں35چھکے بھی لگائے۔

انٹرنیشنل میڈیا کے مطابق آسٹریلوی کرکٹر ہر جس سنگھ نے ہفتے کو50 اوورز کے گریڈ کرکٹ میچ میں شاندار اننگز کھیلی۔ 20 سالہ ہر جس سنگھ نے ویسٹرن سبربز کی نمائندگی کرتے ہوئے سڈنی کرکٹ کلب کے خلاف پیٹن پارک میں 35 چھکوں اور 14 چوکوں کی مدد سے 141 گیندوں پر 314 رنز کی ناقابل شکست ریکارڈ ساز اننگز کھیلی۔ ہر جس سنگھ کی شاندار اننگز کی بدولت ویسٹرن سبربز نے 50 اوور میں 5 وکٹوں پر 483 رنز بنائے۔ ہر جس سنگھ محدود اوورز کی گریڈ کرکٹ میں ٹرپل سنچری بنانے والے دنیا کے پہلے بیٹر بن گئے ہیں۔