17برس قبل اسلام آباد سے لاپتہ ہونیوالی لڑکی کہاں سے ملی؟

کراچی (کھوج نیوز) 17سال قبل اسلام آباد سے لاپتہ ہونے والی لڑکی کہاں سے ملی؟ اس حوالے سے تمام تر تفصیلات سامنے آگئی ہیں ، لڑکی لاپتہ کیسے ہوئی اور کہاں تھی؟ تفصیل سامنے آگئی۔
تفصیلات کے مطابق اسلام آباد سے 17 سال قبل لاپتہ ہونے والی 27 سالہ کرن کو ایدھی سینٹر کراچی کی جانب سے والد کے حوالے کردیا گیا ہے۔ کرن کی بازیابی اور شناخت سیف سٹی پنجاب کے تعاون اور کوششوں کے نتیجے میں ممکن ہوئی۔ کرن نے ملاقات کے دوران بتایا کہ وہ گھر سے آئسکریم لینے نکلی تھی لیکن راستہ بھول گئی، بعد میں کسی نے اسے ایدھی سینٹر اسلام آباد پہنچا دیا۔ کچھ عرصے بعد مرحومہ بلقیس ایدھی اسے کراچی لے آئیں جہاں وہ ایدھی سینٹر میں زیرِ کفالت رہیں۔
کرن کا کہنا ہے کہ ایدھی سینٹر میں قیام کے دوران انہوں نے دینی اور دنیاوی تعلیم حاصل کی اور ان کا وقت نہایت خوشگوار گزرا۔ کرن نے والدین سے ملنے کی خوشی کا اظہار کرتے ہوئے کہا کہ آج کا دن ان کی زندگی کا اہم ترین دن ہے۔ ایدھی سینٹر کی انچارج شبانہ فیصل کے مطابق کرن کی والدین سے ملاقات کے لیے کئی مرتبہ بس سروس کے ذریعے انہیں اسلام آباد بھیجا گیا لیکن کوئی سراغ نہ مل سکا۔ انہوں نے مزید بتایا کہ گزشتہ چند روز کے دوران ملک بھر سے 12 بچے والدین سے مل چکے ہیں، جبکہ کراچی سے یہ پانچویں لڑکی ہے جس کے والدین کا پتہ لگایا گیا ہے۔



