برطانیہ (مانیٹرنگ ڈیسک) گوگل اسسٹنٹ کا عہد کب ختم ہونے والا ہے اس حوالے سے فائنل تاریخ سامنے آگئی ہے، اس کی جگہ کس کو دی جائے گی؟ اس حوالے سے تفصیلات سامنے آگئی ہیں۔
انٹرنیشنل میڈیا کے مطابق آرٹی فیشل انٹیلی جنس (اے آئی) ٹیکنالوجی سے لیس چیٹ بوٹ جیمنائی بہت جلد اینڈرائیڈ ڈیوائسز میں گوگل اسسٹنٹ کی جگہ لینے کے لیے مکمل طور پر تیار ہے۔ گوگل نے 2025ء کے شروع میں اعلان کیا تھا کہ گوگل اسسٹنٹ کو ریٹائر کرکے اس کی جگہ جیمنائی کو دی جائے گی۔ درحقیقت تمام صارفین کو اس تبدیلی کو اپنانے پر مجبور کیا جائے گا اور اینڈرائیڈ فونز، اینڈرائیڈ آٹو، گوگل ٹی وی اور دیگر سروسز میں گوگل اسسٹنٹ دستیاب نہیں ہوگا۔ اب اینڈرائیڈ اتھارٹی نے ایک رپورٹ میں بتایا کہ کب گوگل اسسٹنٹ کو ریٹائر کیا جائے گا۔
گوگل کے اینڈرائیڈ آٹو سپورٹ فورم میں ایک بینر میسج میں بتایا گیا کہ گوگل اسسٹنٹ صرف مارچ 2026 تک دستیاب ہوگا۔ البتہ اس میں تاریخ نہیں لکھی گئی یعنی مارچ 2026ء کی کس تاریخ کو اسے باضابطہ طور پر ریٹائر کر دیا جائے گا۔ گوگل اسسٹنٹ کی جگہ جیمنائی کو دینا زیادہ حیران کن بھی نہیں کیونکہ کمپنی کی جانب سے اس کا عندیہ پکسل9 اسمارٹ فون میں جیمنائی کو ڈیفالٹ ورچوئل اسسٹنٹ کی حیثیت دے کر دیا گیا تھا۔ گوگل کی جانب سے جیمنائی کے پھیلا کے لیے کافی کام کیا جا رہا ہے اور ایپس میں جیمنائی کو زیادہ سے زیادہ منسلک کیا جا رہا ہے۔ جب گوگل کی جانب سے اس بارے میں پہلی بار اعلان کیا گیا تھا تو اس وقت بتایا تھا کہ رواں سال کے آخر تک بیشتر موبائل ڈیوائسز پر گوگل اسسٹنٹ تک رسائی ختم ہو جائے گی یا وہ ایپ اسٹورز میں دستیاب نہیں ہوگا۔
