جنوبی افریقہ (سپورٹس ڈیسک) جنوبی افریقہ کے سابق کپتان فاف ڈوپلیسی بھارتی لیگ آئی پی ایل کھیلیں گے یا پاکستان سپر لیگ (پی ایس ایل) کا حصہ بنیں گے؟ اس حوالے سے فیصلہ ہوگیا۔
انٹرنیشنل میڈیا کے مطابق فاف ڈو پلیسی نے نئے چیلنج کے طور پر پاکستان سپر لیگ میں کھیلنے کا فیصلہ کیا ہے۔ سابق جنوبی افریقی کپتان کا کہنا تھا کہ انہوں نے14 سیزن کے بعد آئی پی ایل نیلامی میں اپنا نام نہ دینے کا فیصلہ کیا ہے۔ فاف ڈو پلیسی کا کہنا تھا کہ بھارت نے بہت یادیں، تجربات اور عزت دی، یہ الوداع نہیں ہے میں پھر آؤں گا۔
انہوں نے مزید کہا کہ میں نئے ملک، نئے ماحول اور نئی لیگ کا تجربہ کرنے کے لیے پرجوش ہوں، پاکستان کی مہمان نوازی کے لیے بھی پرجوش ہوں، جلد ملاقات ہوگی۔ پی ایس ایل سے متعلق فاف ڈو پلیسی کا کہنا تھا کہ اس سال میں نے ایک نیا چیلنج لینے کا فیصلہ کیا ہے، میں آنے والے پی ایس ایل سیزن میں کھیلوں گا۔ فاف ڈو پلیسی کا کہنا تھا کہ یہ میرے لیے ایک پرجوش اور نیا قدم ہے، میرے لیے کچھ نیا کرنے اور ایک کھلاڑی کے طور پر ترقی کرنیکا موقع ہے، پی ایس ایل بے پناہ صلاحیت اور توانائی سے بھرپور ہے۔
