عوام کیلئے اچھی خبر، ڈالر اور سونے کے بعد چینی کی قیمتوں میں کتنی کمی ہوئی؟

لاہور(جنرل رپورٹر، مانیٹرنگ ڈیسک) عوام کے لئے ڈالر اور سونے کے بعد ایک اور اچھی خبر سامنے آئی جس میں چینی کی قیمتوں میں نمایاں کمی دیکھنے میں آئی ہے جبکہ قیمت میں مزید کمی کا امکان ہے۔

تفصیلات کے مطابق پولیس اور ایف آئی اے کے کریک ڈان کے باعث چینی کی قیمتوں میں کمی کا سلسلہ جاری ہے۔ چینی کی ایکس مل قیمت سندھ اور پنجاب میں 150 روپے فی کلو تک پہنچ گئی۔ ایکس مل قیمتوں میں کمی کے بعد ہول سیل مارکیٹوں میں چینی کی قیمت بتدریج کم ہو کر 155 روپے فی کلو تک گرنے کا امکان ہے۔ ریٹیل مارکیٹ میں بھی چینی کی قیمت 165 روپے فی کلو تک ہونے کا امکان ہے۔ مزید بتایا گیا ہے کہ 6 ماہ میں چینی 80 روپے فی کلو مہنگی ہونے کے بعد چینی کے نرخ کم ہونے لگے ہیں، حکام کی جانب سے چینی کے ذخیرہ اندوزوں اور سمگلرز کے خلاف سخت کارروائی کے عندیہ سے چینی کی بے لگام مہنگائی کو ریورس گیئر لگ گیا ہے۔ دو روز میں چینی ایکس ملز ریٹ میں 14 روپے فی کلو تک کمی ہو گئی، چینی کا ایکس ملز ریٹ 16 ہزار 100روپے فی 100 کلو پر آ گیا، چند روز قبل چینی ایکس ملز ریٹ 17 ہزار 500 روپے فی 100 کلو تک پہنچ گیا تھا، چینی کے مستقبل کے سودے 18 ہزار روپے فی 100 کلو ہو رہے تھے لیکن چینی نرخ میں کمی کے بعد مستقبل کے سودے بھی غیر یقینی کا شکار ہو گئے ہیں۔