زارا نور عباس مردوں کی طرفدار‘ میدان میں آگئیں

لاہور(شوبزڈیسک)پاکستانی اداکارہ زارا نور عباس جن کی اب اپنی فیملی کے علاوہ الگ پہچان ہے۔ انہوں نے مردوں کے حقوق پر بات کرتے ہوئے کہا ہے کہ مردوں کی ذمہ داریاں کچھ کم ہونی چاہئیں۔ اداکارہ زارا نور عباس حال ہی میں ایک نجی ٹی وی شو میں شریک ہوئیں جس کے دوران میزبان نے اداکارہ زارا نور عباس سے سوال کیا کہ آپ کے خیال میں وہ کون سے 3 سے 4 حقوق ہیں جو مردوں کو ملنے چاہئیں؟میزبان کے سوال پر زارا نور عباس نے اظہار خیال کرتے ہوئے کہا کہ مرد کی ذمہ داریاں کچھ کم ہونی چاہئیں۔ اس کے لئے ضروری ہے کہ گھر میں موجود تمام افراد ایک دوسرے کی مدد کرنا سیکھیں۔ اداکارہ نے کہا کہ ایک اچھے شوہر یا باپ کیلئے مصروف ہونے سے کہیں زیادہ گھر میں موجود ہونا ضروری ہے، اگر مرد کمانے کیلئے باہر زیادہ رہے گا تو وہ گھر میں موجود نہیں ہو پائے گا۔

مردوں کو دیئے گئے مشورے میں زارا نور عباس کا یہ بھی کہنا تھا کہ ریسرچ کے مطابق مردوں میں عورتوں کے مقابلے میں ہارٹ اٹیک کی شرح بہت زیادہ ہے لہٰذا مردوں کو اپنی صحت کا پورا پوراخیال رکھنا چاہیے، مردوں کو سگریٹ نہیں پینا چاہیے کیونکہ تمباکو نوشی صحت کیلئے بہت خطرناک ہے۔ شوہر اسد کے کاموں سے متعلق سوال پر زارا نور عباس کا کہنا تھا اسد اپنا ناشتہ خود بناتے ہیں اور میں نے ان پر کبھی کوئی پابندی نہیں لگائی کیونکہ رشتے میں پابندیاں نہیں ہوتیں، رشتہ اسکول نہیں ہوتا جہاں پابندیاں لگائی جائیں، اسد اپنی حدود جانتے ہیں میں انہیں کچھ نہیں کہہ سکتی۔