شہرت کو نقصان پہنچانےکا الزام،اداکارہ نرگس نے یوٹیوبرز کو جھٹکا دیدیا

لاہور(شوبز ڈیسک) اداکارہ نرگس نےسوشل میڈیا پرشہرت کو نقصان پہنچانے کےالزام میں اداکارہ نگارچوہدری سمیت 10 سے زائد یو ٹیوبرز کےخلاف ایف آئی اے کے سائبرکرائمزسیل میں مقدمہ درج کرادیا۔ اداکارہ غزالہ ادریس عرف نرگس کی درخواست پر وفاقی تحقیقاتی ایجنسی (ایف آئی اے) کے سائبرکرائمزسیل میں بدھ (4 دسمبر) کو پیکا ایکٹ کی دفعات 20 ،21 اور 511 کےتحت مقدمہ درج کیاگیا۔ درخواست گزار نےمؤقف اختیارکیا کہ ’وہ ایک ناموراداکارہ ہیں مگر چند افراد نے ان کے خلاف سوشل میڈیا پرمہم چلائی، جس سے ان کی شہرت اورساکھ کو ناقابل تلافی نقصان پہنچا’۔

نرگس کی جانب سے ایف آئی میں درج کروائے گئے مقدمے میں الزام عائد کیا گیا کہ ’میں نے یکم نومبر کو اپنے شوہر کی جانب سے تشدد پر مقدمہ درج کروایا، جس کے بعد خاتون صحافی زنیرا ماہم، لاہور پریس کلب کے سابق نائب صدر سلمان قریشی، صحافی شیراز نثار، بلال ظفر، شکیل زاہد، عاطف ملک اور جواد شاہ سمیت مریم علی، اداکارہ نگار چوہدری، عابدہ عثمانی اورمہرین سبطین نے سوشل میڈیا پر ان کے خلاف مہم چلائی۔‘

مقدمے میں الزام لگایا گیا کہ ان افراد نے سوشل میڈیا پر انہیں نشے کا عادی قرار دینے سمیت کئی سنگین الزام لگائے ہیں اور بغیر کسی ثبوت کے ان پر ہونے والے تشدد کو بھی جھوٹ ثابت کرنے کی کوشش کی گئی ہے۔ نرگس کا کہنا تھا کہ ’مذکورہ افراد نے فعال انداز میں میرے خلاف جھوٹی، گمراہ کن اور ساکھ کو متاثر کرنے والی خبریں چلائیں، لہٰذا ان کے خلاف سخت کارروائی کی جائے۔‘

خیال رہے کہ گزشتہ دنوں لاہور کے علاقے ڈیفنس سی میں اداکارہ نرگس کو ان کے شوہر انسپکٹر ماجد بشیر نے مبینہ تشدد کا نشانہ بنایا تھا اور مضروب حالت میں انہوں نے اپنی تصاویر بھی شیئر کی تھیں۔  دونوں میاں بیوی میں پیسوں کے تنازع پر جھگڑا ہوا تھا جس کے بعد اداکارہ نے اپنے شوہر ماجد بشیر کے خلاف مقدمہ درج کروایا تھا۔