سیکیورٹی فورسز کی بڑی کارروائی ،16خوارجی دہشت گردہلاک

اسلام آباد (کھوج نیوز)پاک فوج کے شعبہ تعلقات عامہ(آئی ایس پی آر)کے مطابق 22 اور 23 مارچ کی درمیانی شب، شمالی وزیرستان کے علاقے غلام خان کلی میں پاکستان افغانستان سرحد کے ذریعے دراندازی کی کوشش کرنے والے خوارج کے ایک گروہ کی نقل و حرکت کو سیکیورٹی فورسز نے بروقت مانیٹر کیا۔

ترجمان پاک فوج نے بتایا کہ سیکیورٹی فورسز نے پاک افغان سرحد پر فوری اور مثر کارروائی کرتے ہوئے خوارجی دہشت گردوں کی دراندازی کی کوشش کو ناکام بنا دیا۔آئی ایس پی آر کے مطابق سیکیورٹی فورسز اور خوارجیوں کے درمیان شدید فائرنگ کے تبادلے کے نتیجے میں تمام 16 دہشت گرد مارے گئے۔ترجمان پاک فوج کے مطابق پاکستان مسلسل عبوری افغان حکومت سے کہتا رہا ہے کہ وہ سرحد کے اطراف میں مثر بارڈر مینجمنٹ کو یقینی بنائے، توقع ہے کہ عبوری افغان حکومت اپنی ذمہ داریاں پوری کرے گی اورخوارج کی جانب سے پاکستان کے خلاف دہشت گردی کی کارروائیوں کے لئے افغان سرزمین کے استعمال سے روکے گی۔

ترجمان پاک فوج نے کہا کہ پاکستان کی سیکیورٹی فورسز اپنی سرحدوں کے تحفظ اور ملک سے دہشت گردی کے خاتمے کے لیے پرعزم ہیں، ہر قیمت پر اس ناسور کو جڑ سے اکھاڑ پھینکنے کے لیے مکمل طور پر تیار ہیں۔