ریسلر دین محمد دنیا فانی سے کوچ کر گئے

لاہور(سپورٹس ڈیسک) 1954ء کے ایشین گیمز میں پاکستان کے لئے پہلا گولڈ میڈل جیتنے والے ریسلر دین محمد پہلوان آج اپنے خالق حقیقی سے جا ملے ہیں ان کی عمر 100 برس سے زائد تھی۔

تفصیلات کے مطابق لاہور کے نواحی علاقے باٹا پور کے رہائشی دین محمد پہلوان نے پاکستان کی طرف سے منیلا میں ہونے والے ایشین گیمز میں پاکستان کا پرچم بلند کیا اور ٹائٹل جیتنے کے لیے فلپائن، بھارت اور جاپان کے پہلوانوں کو شکست دی تھی۔ دین محمد نے 1954 کے ایشین گیمز میں پاکستان کے لیے گولڈ میڈل جیتا تھا، ریسلر دین محمد پہلوان کی عمر 100 برس سے زائد تھی۔

واضح رہے کہ دین محمد نے ایشین گیمز میں میڈل جیتنے کے علاوہ کئی انٹرنیشنل مقابلوں میں پاکستان کا پرچم بلند کیا اور کامن ویلتھ گیمز میں بھی برونز میڈل جیتا۔ صوبائی وزیر کھیل ملک فیصل ایوب کھوکھر اور ڈی جی اسپورٹس پنجاب خضر افضال چوہدری نے بابا دین محمد کے انتقال پر گہرے رنج و غم کا اظہار کیا ہے۔ صوبائی وزیر کھیل نے کہا کہ ریسلر دین محمد کی ملک کے لیے خدمات ناقابلِ فراموش ہیں اور انہوں نے ریسلنگ میں پاکستان کا پرچم بلند کیا۔