ممبئی (شوبز ڈیسک) بھارتی اداکارہ کرشمہ شرما نے ممبئی میں چلتی ٹرین سے چھلانگ کیوں لگائی؟ اس حوالے سے تمام تر تفصیلات منظر عام پر آنے کے بعد شوبز حلقوں میں ہلچل مچ گئی ہے۔
انٹرنیشنل میڈیا کے مطابق اداکارہ کرشمہ شرما، جو راگنی ایم ایم ایس ریٹرنز اور پیار کا پنچنامہ جیسی مشہور فلموں میں اپنی اداکاری کے لیے جانی جاتی ہیں، ممبئی میں چلتی ٹرین سے چھلانگ لگانے کے بعد زخمی ہوگئیں۔ انہیں اسپتال منتقل کر دیا گیا ہے جہاں ان کا علاج جاری ہے۔ اداکارہ کرشمہ نے اپنی انسٹاگرام اسٹوری میں واقعے کی تفصیلات شیئر کرتے ہوئے مداحوں کو اپنی زخمی حالت کے بارے میں بتایا اور دعاؤں کی درخواست کی۔ کرشمہ شرما نے اپنی انسٹاگرام اسٹوری میں لکھا کہ کل شوٹنگ کیلئے ممبئی کے علاقے چرچ گیٹ جانے کیلئے میں نے ٹرین سے سفر کرنے کا فیصلہ کیا اور میں ساڑھی پہن کر ٹرین پر چڑھی اور ٹرین تیز ہوگئی، مجھے احساس ہوا کہ میرے دوست ٹرین میں سوار نہیں ہو سکے اور وہ نیچے اسٹیشن پر رہ گئے جس کے بعد خوف کی وجہ سے میں نے ٹرین سے چھلانگ لگا دی اور اپنی کمر کے بل گری جس سے میرے سر پر شدید چوٹ آئی۔
