اسلام آباد(کھوج نیوز) تھانہ ترنول کی حدود میں اسلام آباد پولیس پر حملہ، جوابی کارروائی میں کلاشنکوف گینگ کا سرغنہ ہلاک جبکہ دو ملزمان زخمی ہوئے ہیں ، ملزمان سے بھاری مقدار میں اسلحہ برآمد کرلیا گیا۔
تفصیلات کے مطابق اسلام آباد پولیس کے ترجمان کا کہنا تھا کہ تھانہ ترنول کی حدود میں چیکنگ کے دوران بین الصوبائی گینگ کی جانب سے پولیس پر فائرنگ کی گئی جس پر پولیس کی جانب سے جوابی کارروائی کی گئی۔ پولیس ترجمان کے مطابق گرفتارملزمان سے کلاشنکوف سمیت دیگر اسلحہ، گولیاں، موبائل فون اور نقدی برآمد کی گئی ہے، ملزمان 35 سے زائد سنگین وارداتوں میں ٹیکسلا، راولپنڈی اور اسلام آباد پولیس کو مطلوب تھے۔ ترجمان نے بتایا کہ اسلام آباد پولیس کی جوابی فائرنگ سے بین الصوبائی ڈکیت کلاشنکوف گینگ کا سرغنہ ہلاک ہوگیا جب کہ دو ملزمان اپنے ساتھیوں کی فائرنگ سے زخمی ہوئے جنہیں گرفتار کیا گیا تاہم اس دوران ایک ملزم دم توڑ گیا۔
