ممبئی (شوبز ڈیسک)بالی ووڈ کے لیجنڈری اداکار دھرمیندر 89 برس کی عمر میں چل بسے ‘ پیر کو دھرمیندر نے ممبئی میں اپنے گھر پر آخری سانسیں لیں، ان کی رہائش گاہ کے باہر ان کے اہلخانہ سفید لباس میں دیکھا گیا۔
انٹرنیشنل میڈیا کے مطابق کچھ روز قبل دھرمیندر ممبئی کے بریچ کینڈی اسپتال میں بھی کئی روز تک داخل رہے۔ معروف فلم ساز کرن جوہر نے بھی انسٹاگرام پر دھرمیندر کی موت کی تصدیق کی اور انہیں خراجِ تحسین پیش کیا۔ میڈیا کا کہنا ہے کہ دھرمیندرا کو دو ہفتے قبل سانس لینے میں دشواری کے باعث اسپتال منتقل کیا گیا تھا جب کہ رواں سال اپریل میں ان کی آنکھ کی سرجری بھی ہوئی تھی۔ رپورٹس کے مطابق دھرمیندر نے آخری بار اپنی اداکاری کے جوہر فلم ‘اکیس’ میں دکھائے جو 25 دسمبر کو ریلیز ہونے والی ہے۔
