لاہور(کھوج نیوز) لاہور ہائیکورٹ کی جانب سے لینڈ پروٹیکشن قانون کی معطلی کے بعد وزیراعلیٰ پنجاب مریم نواز اور چیف جسٹس لاہور ہائیکورٹ جسٹس عالیہ نیلم میں ٹھن گئی ؟
تفصیلات کے مطابق لاہور ہائیکورٹ کی جانب سے پنجاب لینڈ پروٹیکشن قانون کی معطلی پر ردعمل دیتے ہوئے وزیراعلیٰ پنجاب مریم نواز کا کہنا تھا کہ برسوں اور دہائیوں کے ستائے ہوئے لاکھوں اہل پنجاب کی مدد کا قانون بنایا۔مریم نواز نے کہا زمینوں کے مقدمات میں دہائیوں اسٹے آرڈر چلتے ہیں، اس قانون کی معطلی سے ہماری ذات کو کوئی نقصان نہیں ہوا۔ انہوں نے کہا کہ عدالتی فیصلہ اعلیٰ عدلیہ کے طے کردہ مسلمہ اصولوں کے مطابق نہیں، قانون کی معطلی سے قبضہ مافیا کو فائدہ ملے گا اور عوام اسے قبضہ مافیا کی پشت پناہی سمجھیں گے۔
وزیر اعلی پنجاب کا کہنا تھا قانون سازی کرنا صوبائی اسمبلی کا آئینی حق ہے جس سے اسے روکا نہیں جا سکتا، اس قانون کی معطلی سے نقصان غریبوں، مسکینوں، بیکسوں، بیواں اور مظلوموں کا ہوگا جن کی داد رسی ہورہی تھی۔ وزیر اعلیٰ پنجاب نے کہا کہ عوام کی منتخب اسمبلی نے یہ قانون بنایا کہ طاقتور لینڈ مافیا کے چنگل سے عوام کونجات ملے، اس قانون سے پہلی بار عوام کو اپنی قانونی زمین اور جائیداد کے تحفظ کی طاقت ملی۔
