سونا چھپانے کا طریقہ کہاں سے سیکھا؟ اداکارہ رانیارا کا چونکا دینے والا انکشاف

ممبئی (شوبز ڈیسک) سونا چھپانے کا طریقہ کہاں سے سیکھا ہے ؟ اس حوالے سے بالی ووڈ کی اداکارہ رانیا را نے چونکا دینے والا انکشاف کر ڈالا ہے جس کے بعد سب حیران رہ گئے ہیں۔

انٹرنیشنل میڈیا کے مطابق 14کلو گرام سے زائد سونے کی اسمگلنگ کے جرم میں گرفتار بھارت کی کناڈا فلموں کی اداکارہ رانیا را نے دوران تفتیش انکشاف کیا ہے کہ انھوں نے سونا چھپانے کے طریقے یوٹیوب سے سیکھے۔ میڈیا کے مطابق چند روز قبل اداکار رانیا را کو 12 کروڑ56 لاکھ بھارتی روپے کی مالیت کے 14.2 کلو گرام سونا اسمگل کرنے کے الزام میں گرفتار کیا گیا تھا۔ میڈیا کا بتانا ہے کہ دوران حراست ڈائریکٹوریٹ آف ریونیو انٹیلی جنس (ڈی آر آئی) کی جانب سے کی گئی پوچھ گچھ کے دوران رانیا را نے انکشاف کیا کہ مجھے دبئی انٹرنیشنل ائیرپورٹ کے ٹرمینل 3 کے گیٹ اے سے سونا لینے کے لیے بذریعہ انٹرنیٹ کال موصول ہوئی تھیں، اس سفر سے 2 ہفتے قبل ہی غیر ملکی نمبرز سے کال آرہی تھی جس کے بعد میں نے پہلی بار سونا اسمگل کیا۔ اداکارہ نے بتایا کہ مجھے ائیرپورٹ کے ڈائننگ لانج میں سفید گان میں ملبوس ایک نامعلوم شخص نے دو پیکٹ دیئے تھے جبکہ میں نے سونا چھپانے کا طریقہ یوٹیوب سے سیکھا۔میڈیا رپورٹ کے مطابق ائیرپورٹ پر رانیا را نامعلوم شخص سے سونا لینے کے بعد اسے واش روم میں لے گئیں، بعد ازاں اداکارہ نے کپڑوں میں سونے کی سلاخیں (ٹیپ سے چپکا کر) سونا اسمگل کرنے کی کوشش کی تھی، رانیا نے اپنے جوتوں اور جیبوں میں بھی سونے کے چھوٹے ٹکڑے چھپا رکھے تھے۔