چینی بحران، عوام بلیک میں مہنگے داموں خریدنے پر مجبور

لاہور/اسلام آباد(کھوج نیوز) لاہور سمیت اسلام آباد سے چینی مارکیٹوں سے غائب ہو گئی ہے جس سے چینی کے بحران نے سر اٹھا لیا ہے اور عوام اس کو بلیک میں مہنگے داموں خریدنے پر مجبور ہو گئی ہے۔

تفصیلات کے مطابق لاہور اور اسلام آباد کے کئی بازاروں سے چینی غائب ہوچکی ہے جس کے باعث عوام مارکیٹوں کا چکر لگانے پر مجبور ہیں جبکہ حکومت نے چینی کے بحران پر قابو پانے اور قیمتوں میں استحکام کے لیے شوگر ملز ایسوسی ایشن کے نمائندوں کا اجلاس آج بلالیا۔ حکومت اور شوگر ملز ایسوسی ایشن کے نمائندوں کا اہم اجلاس آج ہوگا جس میں طے کیا جائے گاکہ عوام کو مقررہ قیمت پرچینی دینیکے معاہدے پرعمل کیسے کرایا جائے؟ دوسری جانب حکومت کی جانب سے چینی کی ایکس مل قیمت 165روپے اور ریٹیل قیمت 173 روپے مقرر کرنے کے باوجود عوام کو سستی چینی میسر نہیں۔ چینی اب بھی ہول سیل میں 174روپے فی کلو میں فروخت ہورہی ہے اور ریٹیل میں 180سے 190 روپے میں مل رہی ہے۔ پشاور میں چینی کی ہول سیل قیمت175 روپے اور ریٹیل قیمت 180روپے فی کلو ہے جب کہ کوئٹہ میں چینی ہول سیل میں 178 روپے اور ریٹیل میں 185سے 190روپے فروخت کی جارہی ہے۔