پی ٹی آئی کے کتنے نظر بند کارکنوں کو اڈیالہ جیل سے رہائی ملی؟

اسلام آباد(کھوج نیوز) پاکستان تحریک انصاف کے کتنے نظر بند کارکنوں کو اڈیالہ جیل سے رہائی ملی؟ رہائی ملنے والوں کے نام اور تمام تر تفصیلات بھی منظر عام پر آگئی ہیں۔

تفصیلات کے مطابق نظربندی کی مدت مکمل ہونے کے باعث پاکستان تحریک اںصاف کے نظر بند 13 کارکنان کو اڈیالہ جیل سے رہا کردیا گیا۔ جیل ذرائع نے بتایا ہے کہ گزشتہ 2 روز کے دوران پی ٹی آئی کے 19 کارکنوں کواڈیالہ جیل سے رہا کیا گیا ہے، ان کارکنوں کونقص امن کے خطرے کے پیش نظرحراست میں لیا گیا تھا، ضلعی انتظامیہ نے پی ٹی آئی کے کارکنان کی نظربندی کے احکامات جاری کیے تھے۔

علاوہ ازیں پاکستان تحریک انصاف کے چیئرمین عمران خان سے ملاقات کرنے والے وکلا کی فہرست تیار کرلی گئی، سپرنٹنڈنٹ اڈیالہ جیل نے سابق وزیراعظم سے پوچھ کر لسٹ ہائی کورٹ میں جمع کرا دی، جیل انتظامیہ نے بتایا ہے کہ چیرمین پی ٹی آئی عمران خان سے ملاقات کرنے والے وکلا کی فہرست مرتب کر لی گئی ہے، پی ٹی آئی چیئرمین سے 10 وکلا کی ٹیم کو ملاقات کی اجازت ہو گی، وکلا ٹیم میں حامد خان، بیرسٹر عمیر نیازی، بیرسٹر سلمان اکرم راجہ بیرسٹر علی ظفر شامل ہیں، بیرسٹر سلمان صفدر، لطیف کھوسہ، شعیب شاہین، علی گوہر، برہان معظم اور شیر افضل مروت بھی اس لسٹ میں شامل ہیں۔

جیل انتظامیہ کا کہنا ہے کہ ملاقات کی فہرست اسلام آباد ہائی کورٹ میں بھی جمع کروائی گئی ہے، سپرنٹنڈنٹ جیل نے عمران خان سے پوچھ کر لسٹ ہائیکورٹ میں جمع کروائی، منگل اور جمعرات کو 10 رکنی وکلا ٹیم کو پی ٹی آئی چیرمین سے ملاقات کی اجازت ہو گی۔ معلوم ہوا ہے کہ اسلام آباد ہائیکورٹ نے عمران خان کو سہولیات کی فراہمی سے متعلق درخواست نمٹانے کا تحریری حکم جاری کردیا، جسٹس میاں گل حسن اورنگزیب اور جسٹس ثمن رفعت امتیاز نے فیصلہ جاری کیا، جس میں کہا گیا ہے کہ سپرنٹنڈنٹ اڈیالہ جیل کے اقدام پر چیئرمین پی ٹی آئی کے وکلا نے اظہار اطمینان کیا، سپرنٹنڈنٹ جیل نے کہا فیملی ہفتے میں دو دن ملاقات کی درخواست دے تو قانون کے مطابق فیصلہ کریں گے۔